Betidanik urtebetetzeak ospatzea
izan dut gustuko, behin baino gehiagotan egiten dut, familiakin, lagunekin,
lanean…. Badakit urteko beste egun bat besterik ez dela baina urte berria
bezala hartzen dut, erronka berriei aurre egiteko unea. Ametsak, planak egin … indarrak berritu,
egindakoaz ikasi eta ospatu, ospatzeko arrazoiak nekez bada ere bilatzen saiatzen
naiz.
Ez dut erranen denei gustatzen
zaizkigula holako ospakizunak baina, aste honetan bertan, ardoa eta pastak
ekarrita, baten batek Parlamentuan ere ospatu nahi izan duela argi gelditu
zaigu. Amorrua eman dit, iraingarria suertatu zait. Hori baino gehiago behar
dugu denok; zoritxarrez dugun panorama latza ez da moldatuko irribarre batekin,
ardo eta pasta madarikatu horiek hartuta. Gehiago behar dugu irensteko beste
urte bat, gehiago jakiteko zer eginen dugun euskaltegiekin, komunikabideekin, haur eskolekin…
Hezkuntza legegintzaldia
litzatekeela erran zigun parlamentuan Barcinak bere lehenbiziko diskurtsoan, ez
genekien orduan, hezkuntza publikoa desegiteaz ari zela, murrizketa
bukaezinetaz, etengabeko erasoetaz… Ez du lortu eta ez du lortuko.
Urtebetzeetan, anitz urtez erran
ohi dugu baina kasu honetan ezin dut halakorik bota, ez da pertsonala baina
irenstezina egiten zait beste urte batez pairatu behar izatea. Ardoa eta pastak
ekarri ditu… nik merengezko tartak nahiago ditut. 