Malkoak ez dira irristatzen diren bakarrak

Malkoak ez dira irristatzen diren bakarrak

10500, horrela ikusita ematen ahal du zenbaki arrunta dela, baina batzuentzako ez da hala, zenbaki bat baino gehiago da, hain zuzen ere N121A errepidetik mugitzen diren ibilgailuak, tartean kamioi aunitz. Egunero, 10500 kezka, horrela aditu dut azken egun hauetan. Kezka, beldurra, inpotentzia, bakardadea… Nafarroako beste eskualde batean horrelakorik onartuko lukete?

Aste batean hiru istripu suertatu dira, eta ausartzen dira erratera hor ez dela deus berezirik gertatzen, deus ez?  Hori normala da? Euria kontua dela? Ez dute hemengo klimatologiaren berri? Ez da lehorra bada! Euritsua baizik. Eguraldia ez da berria eta egoera ere aspaldiko kontua, hamaika aldiz salatu dugu eta lortu dugun bakarra hitzak izan dira, neurririk ez.

Guk bitartean ez dugu hitzik aurkitzen, emozio zurrunbilo honetan zaila da oso hitz egokiak harrapatzea, zer erran familiakoei, lagunei? Malkoak ez dira irristatzen diren bakarrak, kotxeak ere errepide madarikatu horretan. Samina ikusten dut begi anitzetan, amorrua, ezina, … ikusi bai eta ulertu ere.

Istripu gehiagorik ez! N-121-A konponbidea orain!

Infantaren maitemintzetik urrun dagoen herri batean… malkoak ozeano bihurtu ditugu.

Erranen nuke denok noizbait sentitu ditugula tximeleta horiek, aldibereko erokeria eta baretasuna. Gutxien espero duzunean heltzen da eta horrelako sentsazioak nerabezaroan kokatzen baditugu ere, sortzen duen itsutasuna ez da adin kontua, eta dirudienez ez klase kontua ere. Maitemintzeaz ari naiz, zorionez izugarrizko esperientzia honek ez du behin betiko itsutasuna sortzen. Gizaki emozionalak gara baina ez soilik, inteligenteak ere, gure emozioak ezagutzeko eta kudeatzeko gaitasuna dugu. Horregatik kezkatzen nau infantaren kasuak. Itsukeriak ez dio utzi bere ondoan gertatzen zenaz ohartzen, behin betiko maitemintzean bizi omen. Eritasun arraroa, eta garestia guretzat!

Bitartean, beraiengandik oso urrun dagoen beste toki batean, giza eskubideak defendatzeagatik, konponbidea bilatzeagatik, bakea aldarrikatzeagatik denak delitugileak, denak hiltzaileak; justizia denontzako berdina izanik ere, hor ez omen da behar epaiketarik. Zertarako? Beraiek badakite.

Ernatutako Euskal Herriaz ari naiz, eskerrik asko Velasco astintzeagatik. Gure herria maite dugu, bakea nahi dugu, behar dugu. Eta gu, benetan, ez dut uste itsuak gaudenik, ez maitasunez, ez begiak malkoz beteak ditugulako. Gure malkoak, tantaz tanta, joan dira itsasora, ozeano bihurtu ditugu.