"Aurreiritziak, iritziak eta wert-ekeriak"

Aurreiritziak, iritziak eta “Wertekeriak”

Anitzetan aditu behar izan dugu ezetzean kokatuak gaudela, aurreiritziak beteak omen. Badakizue, gureak jakin gabeko aurreiritziak beraienak iritziak, fundamentuzkoak gainera. Kritika hori saihesteko nahian, ongi  irakurri arte, ez dut sobera hitz egin Wertek proposatzen duen aldaketaz.

Orain bai, proposamena leitu dut goiti behitik. “Izenburu polita” jarri diote: hezkuntza kalitatea hobetzeko legea, kasi erranen nuke polita duen bakarra hori dela, izena. Bestea kezkagarria, ikaragarria. Inon ez dute definitzen zer den kalitate kontu hori, soilik erraten digute ez dela neurtu behar inbertsioa kontuan izanik, edo irakasle kopurua edo ratiorik, ez!! Hori ez omen da inportantea, emaitzei begira neurtu behar da, zer emaitzei ere, ez du zehazten; horrek izutzen nau garrantzia bakarrik ikasgai tipikoei ematen dietelako. Adimen aniztasunarena, aditu izanen dute noizbait?? Bai …; ulertu ez dut uste, hori erabiltzen baitute ikasleak sailkatzeko, hezkuntza oztopo-lasterketa bihurtuz.

Europarekin erkatuz eskola porrota txikitu nahi omen du PPk, horretarako proposatzen du errezeta bakarra, Nafarroan ditugun beharrei kasu egin gabe; bost axola, 17 eredu desberdin izatearen beldurrez: denontzat kafe hutsa, beraien eredu diskriminatzailea eta … zinismo osoz solasten da ikastetxeen autonomiaz, ikastetxeei eman herriei kentzen zaiona??? Hori ironia …

Konparatzerakoan ahazten zaie OCDEk argi utzi diona Espainiar estatuari: ikasle banaketa goiztiarrak eskola porrota handitzen duela eta … hain zuzen ere egiten den proposamena hori da.

Hezkuntza berdintzailea ez zaio axola Wert jaunari, edo …  hobe errana bai, anitz gainera. Horregatik, tontoa ez denez, eta jendeari kalitatezko heziketa emanez gero PP-ren politika menperatzailea arriskuan jartzen duenez, kontrakoa ezarri nahi digu:

 gutxi batzuentzako heziketa selektiboa.