Langabeziaren kontra,eskubideen alde, borroka soziala, denon borroka!!!

Azkeneko egunotan, gauza bat eta bestea, batzuei aditu behar izan diegu erakundeekiko errespetua eskatzen. Honekin zalantza batzuk sortu zaizkit, zer da hori? Zer da erakundeekiko errespetua? 

Gaizki al da Goya sari banaketan erratea batzuek erran zutena? Deserosoa bai, ziur, baina ez zait desegokia iruditzen murrizketen aurkako aldarrikapenak egitea. Kalean dagoen zerbait plazaratu zuten besterik ez, kulturari Gobernuak egiten dion mesprezua, desjabetzeak, giza arloko murrizketak oro har. Errespetua funtsezkoa da, ezinbestekoa baina ez bakarrik erakundeekikoa … Zein da Gobernu horrek  adierazten duen errespetua langabetuekiko? Ahaztu zaie orain errespetuz hitz egin dutenei Madrilgo Kongresuan botatako “izorrai” famatu hori? funtzionarioei zer errespetua adierazten die Gobernuak? Egoera larria da, hainbeste urtetan irabazitako eskubideez ari gara, dirua lapurtzeaz gain, eskubideek egunero pairatzen dute murrizketaren bat, bitartean, zer da egin behar duguna? Zer nahi dute egitea? Isilik egon?

Goya sari banaketa niri urrun suertatu zitzaidan baina … hara non, oso egoera antzekoa bizi genuen azkeneko plenoan, langabetuen asanblada palkotik oihuka hasi zenean. Batek baino gehiagok, presidentea barne, lotsagabekeriatzat hartu zuen, damutzeko zerbait, espektakulo desatsegina, baldarkeria zela aditu behar …

 Parlamentuan badirudi bakarrik parlamentariook hitz egin dezakegula, eta egia bada ere horretarako gaudela, Gobernua kontrolatzeko, bakoitzak bere neurrian ordezkatzeko ordezkatu beharrekoa, … nahiko al da horrekin? Beharrezkoa bai, nahiko ez.

Instituzioak inportanteak dira, baina ez dira parte hartzeko modu bakarra, ez genuke deuseztatu behar mugimenduen beste aktibismo hori, osagarriak dira, giza mugimenduen ekintzak ezinbestekoak dira, neurrian, ongi antolatuak, errespetuz. Murrizketen politikak frenatzeko uholde bihurtu behar dugu, denok elkarrekin.

Langabeziaren kontra langileen borroka!! oihukatu zen, nik -errespetuz noski- zerbait gaineratuko nuke:

Langabeziaren kontra, eskubideen alde, borroka soziala, denon borroka!!!

 

 

Gomendioaren gomendioak

Gomendioaren gomendioak

Lana ez dagoenean, langabeziaren zenbakiek izutzen gaituztenean, lana sortzeko politikatan zentratu beharrean, hezkuntzan inbertitu beharrean Unibertsitatea oso garestia ateratzen dela segitzen dugu aditzen, batez ere letretako karrerak… Akaso ikasle batzuek aukera hori izanen dute besteok… hobe dute atzerrira joatea pizzak egitera. Gezurrak gezurren gainean, argudiorik gabe...

Zer da lan irteera? Zer karrerek dute halakorik?  Argi izan beharko dugu, horiek aukeratu behar omen. Adituek diote Unibertsitatean ikastea oso garestia dela eta oraindik aurrera aukeratu beharko dugula Madrildik erraten digutena:  Lan irteera dituzten ikasketak … , espero dut denok ez hartzea bestela lan irteerarik gabe geldituko dira ere…

Halaxe bota du lasai ederrean Hezkuntza Estatuko idazkariak, Gomendio andereak, hau  gomendioa! Abizena ezin hobe datorkio.  Bidenabar probexten du aipatzeko gaur egungo ikasleek jakin gabe aukeratzen dutela, aholkurik gabe, berriro ere tutoreek eta orientatzaileek egiten duten lana ezagutu gabe eta gutxiezten … Ez dakit nork aholkatu zion berari bere unean, ez dakit zergatik aukeratu zuen aukeratu zuena.  Biologia ikasi zuen, Biologiak lan irteera zuen garai horretan? Ikerketa arloan aritu da Gomendio anderea eta horregatik harritzen naute oraindik gehiago bere adierazpenek. Ikerketan aritzea, lan irteera da? Erranen nuke PPk ez duela horrela onartzen, zientzialariek gero eta babesa gutxiago sentitzen dute. Hemen ez dute ez inbestigazioan sinesten, ez hezkuntzan, soilik lan merkatuan, gauzatzat, makinatzat hartzen gaituzte beraientzako diru erreza ateratzeko besterik ez.

Ez naiz ni letretakoa, ezta horrelako sailkapenik egitearen aldekoa. Nahiz eta Unibertsitateko hezkuntza politikan aditua ez izan, argi dut gizartean dauden beharrei erantzuna eman behar diela, Unibertsitateak ezagupenaren oinarria jartzen duela eta hori noski ez dela moldatzen “letretako karrerak” alde batera utzita. Ezin da etxe bat eraiki soilik zementokin, hori baino askoz ere gehiago behar dugu, ez da hala?