Eskubideak salmentan

Egunero- aldarrikapen bat edo beste- kalean gaude, eskubideen murrizketa geldiarazi nahian. Aspaldi dakigu- eta nolabait, nahi gabe bada ere, barneratua dugu- denok ez garela berdinak, nahiz eta paper politetan horrelakorik agertu.

Ez, ez gara berdinak, ez da gauza bera emakume izan edo gizonezkoa; ez da berdina 70 urte izan, 30 edo 10; ez da berdina ezgaitasunen bat izan edo ez; eta noski ez da gauza bera hemengoa izan ala kanpokoa, are gutxiago paperrik izan ala ez izan. Hau guztia areagotzen da azalaren iluntasunaren arabera, ahalik eta ilunen izan, orduan eta eskubide gutxiago. Legeak badira bai, hor dugu adibidez estranjeria lege hori, non etorkinak makinaria gisa ikusten dira, lan egiteko (eta merke) balio dute, besterik ez.

 

Lan merkatura behera egin ahala goiti egin dira etorkinen kontrako zurrumurruak: hezkuntzan “gure” maila jaitsi omen, osasun arloa kolapsatzen dute, diru laguntza guztiak eramaten dituzte justifikaziorik gabe ….  Eta beste abar luze bat bururik eta hankarik gabekoa. Hori horrela izanik, austeritatea eta jasangarritasunaren izenean, hasi ziren “neurriak” hartzen: lehenbiziko errolda kontuekin, oinarrizko errenta gero, oztopoz oztopo osasun arreta murriztu. Neurri gehienak Madrildik diktatuak datoz eta hemen “dei efektua” saihesteko aplikatzen dira.

Orain beste neurri bat dator, argi uzten duena badela zerbait berdintzen gaituena: DIRUA. 160000 euro dituena berdin da nongoa den, emakumea edo gizonezkoa izan, azala zuria zein beltza …; horrek erresidentzia baimena izanen du, horientzako bai eskubideak, eta 320000 € badituzte? Akaso alfonbra gorria jarriko diete.

Betidanik erran didate eta horrela saiatu naiz irakasten justizia, ekitatea, dela bakoitzari ematea behar duenaren heinean baina bizitzak erakusten digu hori gezurra dela. Bakoitzari ematen zaiola bere boterearen arabera, bere diruaren arabera. Jendarte justuago eraikitzearen kontrako norabidean eraman nahi gaituzte eta nik bide hori ez dut eginen. Eskubideak ez direlako saltzen, eskubideak aitortzen direlako, pertsona guztiak eskubide berberak!!